48 mulleres asasinadas en España, vítimas da violencia de xénero

No que vai de ano, en España foron asesinadas 48 mulleres, vítimas da violencia machista. O curso pasado dúas compañeiras da clase fixéronnos unha presentación ao redor desta lacra, sobre a que veu falar connosco Lola Ferreiro.

Onte sábado, 7 de novembro, tivo lugar en Madrid unha manifestación con organizacións procedentes de todos os territorios do Estado español para protestar por esta situación.

Resulta sorprendente como hai non moitos anos, o que hoxe consideramos inaceptable —calquera forma de violencia contra a muller— era tratado como chiste. 

Aproxímase o Día Internacional contra a violencia de xénero. É unha boa ocasión para saber máis sobre este terrible problema. Se navegas pola rede atoparás numerosos sitios sobre a violencia de xénero. Un deles é o da Xunta de Galicia. Outro, o do Goberno de España.

"Chove en Santiago"

Agora que rematamos o tema dos climas e do tempo, aquí vai un poema.
A raíz das viaxes de Federico García Lorca polas nosas terras, o poeta granadino escribiu en galego, seis poemas dedicados a Galicia. Deles procede “Chove en Santiago”:

Chove en Santiago

meu doce amor

camelia branca do ar

brila entebrecida ao sol.

Chove en Santiago

na noite escura

herbas de prata e sono

cobren a valeira lúa.

Olla a choiva pola rúa

laio de pedra e cristal.

Olla no vento esvaido

soma de cinza do teu mar.

Soma e cinza do teu mar

Santiago,lonxe do sol

agoa da mañan anterga

trema no meu corazón.

 Podes escoitar unha interpretación musical deste poema ao coidado de Luar na lubre e Ismael Serrano en https://www.youtube.com/watch?v=FwvbAyoFDWw

Falamos de mapas?

El Roto é un comentarista gráfico cuxo nome é Andrés Rábago. Utilizamos algunha das suas viñetas na materia de Historia do Mundo Contemporáneo, en 1º de Bacharelato. Podes atopalas na web De hoxe.Historia do Mundo Contemporáneo.

Este debuxo fala de mapas pero non fala de mapas. Que nos pode estar dicindo? Podémolo relacionar cos Obxectivos do Milenio?

Tremores de terra en Galicia

Estudamos o concepto de "tectónica de placas". E con este concepto están relacionados os tremores de terra que, nosúltimos días, rexistrou o Instituto Geográfico Nacional. Foron, iso si, dun nivel baixo na escala de Richter. A zona do sur de Ourense e o Leste e Norte de Lugo son as de maior risco sísmico da nosa comunidade, aínda que cunha perigosidade moi inferior á das provincias de Almería, Murcia, Alicante e Granada. A sismicidade destas provincias débese á proximidade da placa euroasiática á africana.

Se queres máis información, preme na ligazón do Instituto Geográfico Nacional, organismo oficial encargado do estudo da sismicidade en España.

DANA

O 29 de setembro, a Agencia Estatal de Metereológía emitía o seguinte parte:
"Estamos inmersos en un episodio de inestabilidad atmosférica característico del otoño en el área mediterránea. El enfriamiento y la formación de depresiones aisladas en los niveles medios y altos de la atmósfera, junto con los flujos dominantes de componente este en los niveles bajos, que aportan aire con mucha humedad, son los elementos determinantes para que se desencadene esa inestabilidad."

O fenómeno metereolóxico ao que se estaba a referir era unha Depresión Aillada nos Niveis Altos (DANA). No Tema 2 do teu libro de texto tes varias situacións metereolóxicas que se dan na Península Ibérica ao longo do ano, representadas tanto en superficie como en altura. Unha desas situacións é, precisamente, unha DANA, que se produce con certa frecuencia no Levante español, a finais do verán ou principios do outono. Aínda que non é exactamente o mesmo, é un fenómeno que, ás veces, se relaciona coa "gota fría". Normalmente, a DANA provoca chuvias torrenciais, nunha zona na que as precipitacións anuais son escasas.

ODM

O derradeiro tema do noso programa, España no mundo, inclúe un concepto que aparece estes días na prensa: os Obxectivos do Milenio (ODM).

Fixados en 2000 pola Organización das Nacións Unidas (ONU), os ODM son oito metas de desenvolvemento humano que os 192 países membros da Nacións Unidas acordaron acadar en 2015: erradicar a pobreza extrema e a fame; acadar o ensino primario universal; reducir a mortalidade infantil; mellorar a saúde materna; combatir o VIH/SIDA, o paludismo e outras enfermidades; garantir a sustenibilidade do medio ambiente; fomentar o asociacionismo mundial para o desenvolvemento.

Estamos en 2015 e chega o tempo de revisar o nivel de cumprimento deste acordo. Nos últimos días, a ONU celebra a súa asamblea xeral anual. A súa análise dos ODM é relativamente optimista porque, se ben é certo que se produciron avances na reducción da extrema pobreza, na matriculación no ensino primario ou na loita contra a SIDA, tamén é certo que na loita contra a mortalidade infantil ou na mellora da saúde materna queda un longo treito por percorrer.

Agora, os ODM transformaranse en Obxectivos de Desenvolvemento Sustentable (Axenda 2030 para o Desenvolvemento Sustentable), o que sitúa o horizonte de desenvolvemento humano nunha meta máis ambiciosa, na procura dun crecemento económico que sexa sustentable, é dicir, que respecte o medio ambiente. Por certo, un dos escándalos económicos da última semana, o da empresa de automóbiles Wolkswagen, está relacionado, precisamente, con este problema.
Nesta mesma páxina podes ler outras entradas sobre os ODM.